على الدنيا السلام ) :....بقلمي الشاعر جمال زكي عينر

 على الدنيا السلام ) :

كله عايش بالاوانطه
كله بيلكلك كلام
كله لازم يلوي بقه
لما يبدأ بالكلام
اللي عايش دور صياعه
واللي يتباهى بوضاعه
والكلام بقى فيه خلاعه
كل شيء مابقاش تمام

المؤدب يعني سكه
كل الخلق منه فكه
والحرامي له الف سكه
الكل يضرب له السلام

الشباب أشكالها عكره
اللي عامل فيها عتره
واللي ماشي بادوب بستره
شيء يداري والسلام

البنات لابسه المقطع
واللبان في البق طرقع
ولاد بنات كله بيتسكع
مفيش تربية مفيش علام

العيال في الناس بتبوأ
وف بقها تعوج وتلوأ
حتى بالوالدين تتمهزأ
زي ما بتشوف في الافلام

الصعلوك قال بقى اسطوره
بقى بيمثل بقى في الصوره
وبقت ليه افلام مشهورة
بعد ما كان في الخلا بينام

اللي جاى تفتكره رايح
كله مخلوط كله سايح
كله بيموت في الفضايح
والستر من رب الأنام

القيامه راح تقوم
والخلايق غطه نوم
غرقانين ذنوب بالكوم
يعني ع الدنيا السلام

بقلمي الشاعر جمال زكي عينر