فكرتوني بأحلي ايام
****************
فكرتوني بأحلي ايام
والكلام جاب بعضه
معرفش اكل واشبع
الا من علي طبلية امي
المحمر والمشمر
والملوخيه بالشهقه
وطاجن الرز المعمر
فين ايامك يا امي
وعمري ما أنسي ابويا
الراجل العتره
اللي حياته كلها شهامه
ووجاهه وعطره
لما كان يجي رمضان
ويجيب فوانيسه
الاحمر والاصفر
والاخضر وابو فتله
فين ايامك يابو يا
الله يرحم ايامك الحلوة
******************
فكرتوني بأحلي ايام
والكلام جاب بعضه
وانا صغير
امي كانت بتحطلي الكحل
وتقولي يواد ماتعيطش
ده سبت النور
عادات وتقاليد
بس كانت جميلة
وليها معني
والعيال الغلسه
يعايروني ويعاندوني
امي تمسكهم واحد واحد
وتوفقهم طابور
و تكتفهم و تحشي عينهم
بالكحل الحراق قدامي
واشمت فيهم واقول
دور دوردور
مين اللي عليه الدور
*****************
فكرتوني بأحلي ايام
والكلام جاب بعضه
العيال الوحشه
كانوا يخوفوهم
با ابو رجل مسلوخه
اما دلوقت ماتعرفش تخوفهم
دول عفاريت ولاد ابالسه
لسان طويل وقلة ادب
ووشوش مكشوفه
مافيش احترام
مافيش وقار اخر بجاحه
الله يرحمك يا بويا
لما كنت تشوف جدي ترتجف
وتقع من طولك
الدنيا اتغيرت يابويا
بقي في المحمول للنزاهه
للواجاهه والكلام الفاضي
شباب تايه
مش لاقي حاجه معذور
********************
فكرتوني بأحلي ايام
والكلام جاب بعضه
اهي سيرة
بتفكرنا بما فيها
يالله نكمل المسيره
بيتنا كان بيت محدود
صغير علي القد
مهما شوفت من بيوت
بيتنا مالهوش حد
كان عمران بتلاوة القرآن
كانت ايام حلوة بجد
ايامنا كلها نفحات
الله الله لما نشد الحيل شد
ابويا كان عنده مصحف
كبير قوي لسه فاكره
مطلي بمية الذهب
ريحته مسك وعنبري
يلمنا ويقعدنا ويعلمنا
وامي تبخرنا
عيشه كانت فوللي
الله يرحمك يابويا
الله يرحمك يا امي
سبتولنا خير لا ينتهي
******************
بسيوني صديق
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.