إِمْتَ تَوْصَلْ لَلْعِينْ تَشْربْ أُتَرْوى؟
....................................
سْوايَع تْجِي
أُسْوايَع تَمْشِي
آصَاحْبِي إِمْتَ تَصْحا
تَنْفَض جْناحَك
تعْالَج جْراحَك
تَغْلب فْراحَك تْراحَك
تْسَرَّج عُودَك أُتَشْهر سْلاحَك؟
أُتَشْفق عْل حالِي أُحالَك
حْياتِي أُحْياتَك
فْ يَدَّك دْوَاك..
رْجَع لْعَقْلك إِرَشْدك
تْشَبَّت بْ تاريخَك أُهُوِيتَك
نْهَل أُتْزوَّد بَ لْعِلْم أُلْمَعرِفهْ
طَلَبْ أُرْكَبْ كلّْ رْكابَك..
سْوايَع تْجِي
أُسْوايَع تَمْشِي
آصَاحْبِي إِمْتَ تَتْصالَح مْع ذاتَكْ
أُتْفرَّز عَدْيانَك منْ صْحابَك
تَعْرف حاجْتَك
تَقْضِيها أُتْتَدارَك لِّي فاتَك
تَبْدا أُتْكمَّل مَشْوارَك؟
إِمْتَ شَّمْس شَمسِي أُشَمْسك
تَشْرق نْوارْها ساطْعهْ
تَهْزم غْروبَك لِّي طَوَّل أُعَيَّق
تْنَقْدكْ منْ مِيتَات ظَلْماتْ
تْدَفِّيكْ أُتَحْيِيك منْ جْديدْ
إِنْسان نْقِي أُصافِي بَ نْقا نُّور أُلْخِير؟
سْوايَع تْجِي
أُسْوايَع تَمشِي
وَنْتَ فْ بْلاصْتَك كَتَتْمَلْمل وسْط لْغاشِي
أُوْحوشْ عَدْيانَك حاظْيَة لَحْواشِي
كِ نْسُور تَنْقضّْ عْل فْراخَك
أُتْهدّْ عْشاشِي أُعْشاشَك..
سْوايَعْ غادْيَهْ دَقَّهْ بْ دقَّهْ بْلا زْيادَهْ ولاَّ نُقْصانْ
طْريقْها واضَح أُمدْروسْ
نَهْج أُنِظامْ
وَنْتَ ما بَغِي تَتْقَن لْحَسْبهْ
حْياتَكْ رَصِيدْ مَحْدودْ فْ ساعَهْ
لا ريْب فِيها
شُوف كِيف تْوظَّفْها أُتْصرَّفْها مِيزانْ
ولاَّ تْزِيدْ شْقَا أُتْعانِي
أُتْفُوتْ عْلِيكْ وَنْتَ مَتْعوسْ..
سْوايَع تَتْعاقَبْ
طْلوعْ أُهْبوطْ
شْروق أُغْروبْ
أُساعْتك اتِّجاهْ واحدْ هْبوط فَ غْروبْ
وَنْتَ ما مْسوَّق كَتْبلَّطْ أُتْشُوفْ
كَتَسْتنَّى أُتتْمنَّى
إِمْتَ تَوْصَلْ لَلْعِينْ تَشْربْ أُتَرْوى
أُشُوفْ تْشُوفْ!
........................
محي الدين أمهاوش/طنجة
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.