طعم المر ..
..........
بدعوة ليل بيتململ
وصحتني أصلي الفجر
أبص بطرف عين قلبي
لفرشتها اللي خدت السر
بطعم الحزن بتغدى
وبتعشى بنكهة مر
وغصة ف حلقي دابحاني
وبق المايه مش بيمر
سجايري قايده في عيوني
ودخانها مغطي الجمر
يا سحر حياتي والطلسم
يا شايله الجرح والمرهم
دموع الفرقه كسراني
وقلب الصبر مش بيخر
صديد الحرقه عبا لي
وكاس الآه مش بيسر
فردتي سنين من عمرك
ننام فيها ونتغطى
وتحت جناحك الدافي
ما كنتش احس بالغلطه
دموع عينك توضيني
وتغسل همي وأنيني
يا سكه في زمن تايه
طريقك تمتيه بالقبر
تنام روحك مع الولدان
بجنة ربي الرحمن
بمقعد صدق من ربي
سلاما ياضحى قلبي
سلاما يا هنا الأيام
سلاما يا دعاء الفجر
حسن حفني
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.