أمنيات قلم
**********
الكلمه سايقة ف تُقلها
وبتشتهي دمعي الحزين
ينزف ألم
فوق السطور و الكراسات
وسنين حزين
قلبه إنظلم
وبتمنع الشوق ف البنات
يطُل خارج قلبها
ويطمن القلب اللي عاش
يكتب أغاني ف حُبها
ويقولها
انتي الحنان
وانتى الأمان اللي ابتدا
يطرح ندا
ويبل ريق العاشقين
المشتاقين يلقوا الأمل
فارد جناحه للسما
مادد ايديه
لإيدين حبايبه المغرمه
تلمس هواه
وتعيش معاها طول عمرها
من غير ما تشعر بالألم
الكلمه سايقة ف تُقلها
وأنا لسه ماسك بالقلم
وبقايا صوت الذكريات
والفكره ودموع الندم
ومنايا أكتب كلمتين
يبقوا الدوا
للي اشتهي
يكتب كلامه من سُكات
خارج حدود الكُراسات
للي مناه
يلقي هواه
ساكن تملي ف قلبها
وبقربها.. ياما.. حِلم
الكلمه سايقة ف تُقلها
وأنا لسه واقف والقلم
ننزف ألم
علي اللي ضاع من عُمرنا
والصمت ف حروف الكلام
كان للغرام خِصم وحَكم
وهواه نعاتب بعضنا
لو بالعيون المرغمة
تنزف وجع
وهواه نسامح بعضنا
ويظلنا سحر الدلع
ونعود لروحنا الطيبة
والطبطبه فوق الجروح المؤلمة
يمكن ف يوم
ننسى الأهات
ويضمنا حضن العلم
*********************
رضا أبو الغيط
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.