( يا دنيا ليه العذاب ؟ ) :.... الشاعر جمال زكي عينر

( يا دنيا ليه العذاب ؟ ) :

يا دنيا ليه العذاب والفكر والحيرة ؟
غلبت فيكي عتاب مالي رأي ولا خيرة
إن عزت امشي يمين شمالي يحود بي
اما الخصوم والعدا مالهومش غيري سيرة

يا دنيا نفسي بقى تشيليني من راسك
مش عايز ابقى حروف قصة في كراسك
ما تحلي عني بقى وسيبيني مع نفسي
ده الوحدة لو كات عذاب ولا خلطتي بناسك

يا دنيا خفي بقى حملك عن اكتافي
الصحة راحت خلاص ما بقيتش متعافي
حملك تعبني يا دنيا والقوة على قدي
امتى بقى ترحمي وتقولي كده كافي ؟

خفي عليا يا قاسيه كفاياكي حمل تقيل
افكرك لو ناسيه ياما شفت فيكي الويل
من يوم ماجيتك يا دنيا وانتي معانداني
حاصبر عليكي اوي والصبر آخره جميل

حطي عليا يا دنيا وتقلي حمولك
بقى عادي عندي خلاص ماهيه دي اصولك
ياما شفت فيكي الضنا والذل والقسوة
ما بقيتش فارقة خلاص عرضك كما طولك

بقلمي الشاعر جمال زكي عينر