ولما هل علينا العيد
قلت ليه يافرح بعيد
ردت قالت طب ازاى
ماعادت الايد فى الايد
لما كان يهل علينا
نتجمع احنا واهلينا
ونقول يارب يعود علينا
وكل عام يجيلنا جديد
انما حتى الفرحه اتخلت
راحت غابت والله ماخلت
ولا بيت فيه دخلت ولاغنت
وقالت بعدنا ده اكيد
طيب قولوا ايه يجمعنا
حب ورحمه ياريت تسمعنا
وتبقى حياتنا كده لها معنى
ونرحب من تانى بالعيد
يبقى قلبنا على بعضينا
ونقدم الخير بايدينا
وحبنا لبعض حامينا
اغسل قلبك خليه جديد
قدم دايما احلا ماعندك
خلى الحب دايما يندهلك
وتحوط دايما على اهلك
تلاقيهم جنبك بالتحديد
انسى الانا وقول يا خواتى
يااهلى وناسى وكل حياتى
بحسب بيكم دايما حساباتى
من غيركم مش حبقى سعيد
يااللى الانا متمكنه منك
ليه تبعد دايما عن اهلك
من غيرهم قالوا انك تهلك
قرب من اول وجديد
مهما شيطانك قلك ابعد
اياك يغويك ومعاه تعند
خليك اقوى منه وابعد
وجدد حبك لاهلك ده اكيد
فرصه تجدد فيها علاقاتك
وترجع ودك لاخواتك
واهلك دايما هما احبابك
دايما فاتح ليهم بابك
ماتخليش قلبك ده عنيد
علشان تحس بطعم العيد
زى زمان لما كنا صغار
والدار كانت لسه الدار
والاهل كان ليهم مقدار
متفضل على اى جديد
وهو ده كان طعم العيد
#### راوية حسن
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.