ضمايرنا..........للشاعر/ مصطفى فريد

ضمايرنا
من ديوان / ولسه بحلم بفجر
للشاعر/ مصطفى فريد

ياصوت ضمايرنا يا مسجون
إكسر قيدك المجنون
وكون مارد يشيل عنا
دموع ماليه خدود وعيون

هجرنا الحق للبهتان
وصوتنا م الهوان بردان
تاه جواه صدى حلمه
من الحاصل فى كل مكان

نادى ع الوجود والناس
ليه أحقادنا تملا الكاس
بكا الأطفال بيدبحنى
وأيامى بدون إحساس

نادينا يا لحظة الإيمان
خدينا بحب زى زمان
نلملم جرحنا النازف
ونتعلم من الأحزان

دموع طفلى ماليها الشوك
بتجرحنى وانا الممسوك
بطوق خوفى من الأيام
وصوتى اللى صبح مخنوق