زى الميه بتملى اديا بقلم خالدعبدالمعطى

زى الميه بتملى اديا

و لما اضم كفوفى تضيع..

..

زى البسمه تمر عليا

تملا صحارى القلب ربيع..

..

و اما اقرب منها و افتح

قلبى تقفل ع المواضيع..

..

تهرب منى و تبعد عنى

و اما تتوه من عينى بضيع..

..

غاويه بعاد مع انها ساكنه

جوه حروفى..

..

و ان يوم زاد البعد و طول

ينط الشوق و يعيد م الاول

حنينى و خوفى..

..

اه لو اقدر افتح قلبى

قدام منها و اقولها شوفى..

..

اه لو تعرف ان هواها

خلاص اتحول

خطوط فى كفوفى..

..

و انها مهما تعاند فيا

و تزيد قلبى بعاد و قسيه..

انا مش ممكن قلبى يبيع..

..

زى الميه بتملى اديا

و لما اضم كفوفى تضيع..

..

#خالدعبدالمعطى