وقت الفتنه..........احمد محمود عوض سعيد

وقت الفتنه
فى الشده خطوه لورا
وبحكمه لم الدور
نحي جميع الحجج..
واكفي عليها ماجور..
للريح لازم تنحنى
والا تقع مكسور
سيب الغمام ينجلى
ويبانلك المستور
والمعطيات تتراى
تلقى الدليل منظور
وقت الغبار ما انتهى
راح يلمع البنور
وتتحسب خطوتك
وازاى وفين هتدور
هدى الامور وانتظر
واتانى وابقى صبور
امتص موج الغضب
قبل النفوس ما تثور
داوم وصال البشر
بالحب وابنى جسور
تطفى نيران تشتعل
وتمر م المحظور
باللين وبعد الانا
وبدون عناد وغرور
هتسوق قلوب البشر
وتعدى بيها بحور
ومهما شد الحجر
بتدوب بميه صخور
الجم جماح الفتن
وامنع نيرانها تفور
لا برىء ولا متهم
الكل صايبه الدور
اوعى الحماس يدفعك
وبدون ركيزه تثور
وتايد نيران الغضب
تاكل العباد والدور
تشعل فتيل الحروب
سهل وروحاها تدور
لكن الخروج منها
صعب تلاقيله مرور
م الحكمه قبل الكر
للفر تبنى جسور
تعدى بيها الخطر
وقت السيوف ما تجور
واحسب خسايرك بها
قبل مكاسبك شور
تنجى لاما الغرق
يخدك معاه وتغور
لحظة عناد تبتدى
بالدم تبقى بحور
يدفع تمنها شعوب
يتخطفوها نسور
راجع مسار خطوتك
واتحرى اى قصور
عاين بناية الهدف
وعالج المضرور
دارى على مامنك
واحتاط وعلى السور
وسع مجال رؤيتك
واسمع لغيرك شور
وبلاش تسيب الفرح
وتتلهى بطهور
والواقع اللى اتبنى
واصبح كيان وحضور
واجهه بهدوء وادرسه
بتانى حتى شهور
ووعى تعاديه تخسره
وتطب فى المحظور
يمكن تعوض شىء
حتى ان مكاسبك عور
احسن ما تباى كفيف
م تلاقى طاقة نور
ما تسيبشى طيش يسحبك
ولا للسفاهه تشور
ووزن امورك عدل
ونحى اى قصور
جربت قبله الصدام
ضاعت امور وامور
واصحاك من الاوهام
لا تلاقى ارضك بور

احمد محمود عوض سعيد
الرحامنة / فارسكور / دمياط