أصعب لحظة
من ديوان/ ضى نهار
للشاعر/ مصطفى فريد
أصعب وقت
يمر عليك
لما تحس انك وحدانى
وسط كتير واقفين حواليك
تحلف بيك
وتكتب ليك
شعر ونثر وأحلى أغانى
ولما تقابل قلب بيبكى
وتاخده فى حضنك
وتعاهده على إنه يصونك
هو يخونك
تتغير فى عنيك لياليك
أصعب لحظة
لما تكون بتحب بجد
وإيديك تزرع ورد وحب
وتحصد غش وحزن وكدب
ولما تموت دقات القلب
بطعنة غدر
واكتر حد القلب مآمنه
أول حد بيغدر بيك
أصعب لحظة
تشوفها عنيك
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.