شعر عامى
سيبك إنتى
..............
سيبك إنتى من اللى باعك
وانفضى روحك م الهموم
هو ده لو فعلا كان حبك
كان هيسأل عنك كل يوم
سيبك إنتى واشرقى فجر السعاده
وبدلى القهوه وأوعى تشربيها ساده
وانثرى شعرك فوق مشاعرك
وحطى رأسك ع المخده
وإنسى عمرك اللى ضاع منك
وإبتدى يومك من النهارده
بدلى الدمعه ببسمه
وكفاياكى كتير دموع
هو مكنشى من نصيبك
يبقى متنتظريش رجوع
سيبك إنتى من اللى خانك
واللى خان لحظة لقاكى
واللى باع العشره لكن
كان مناه يشوف الدمع بعنيكى
لمى شالك وجلجلى
ولملمى فى شوال ذكرياتك
وارميه على حافة طريق
وانسى قوام مكانه
وإعرفى إنك انتى
اللى عليهم بجد هانه
قضيتى عمرك ف إنتظار
شىء غريب كان مستحيل
والرحيل
أصعب قرار
لكن مكنشى له بديل
كل لحظه من حياتك
تقتل بعض من أمنياتك
حتى إبتسامتك
شحوب ملامحك
كانت تعبر القطر فاتك
أنا عارف أنه كان مناكى
يفضل العمر معاكى
لكن بخته ونصيبه
ما يستاهل لحظة لقاكى
ولا حتى القرب منك
على شط الأمانى وارقصى
وسيبى روحك واتنفسى
هوا من جواكى لكن
بيمحى كل الأماكن
اللى كانت معاه بتجمعك
وأنا من خلال حروفى بمنعك
أوعى فى لحظه تضعفى
وتفضلى
تنوبى نفسك أو تختفى
وبكره أكيد هتعرفى
إن اللى فات مش بتاعك
......................
كلمات الشاعر على سالم
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.