ألغاز الوشوش بقلم : حسام الدين فكري

ألغاز الوشوش
بقلم : حسام الدين فكري
***************************
مين فينا يقدر يعيش
من غير حُبّ ولا عيش
ولا طيف حنان في القلوب
مرسوم على الوشوش
وهيه إيه الوشوش، غير مرايات
عليها كل خطوط الكلام والسُكات
والشوارع والحواري
اللي مرّة هتعدّي فيها
أو تُعبرها كتير مرّات
وفيها أكتر من كده
فيها كل النبضات
عليها أرقام وأسماء وإشارات
ألغاز ما حدّ يفهمها
ولا يقرا اللي بين سطورها
غير اللي مكشوف عنه الحجاب
ده بس اللي يعرف
مين الأصحاب
ومين الأحباب
مين اللي يستاهلوا المودّة
ومين اللي يستاهلوا التراب
ألغاز وطلاسم وأحاجي
وشوش الناس
فيهم اللي ناس بجدّ
وفيهم اللي يشبهوا الناس
كائنات فوق الأرض هوا
وكائنات زيّ الأشجار
إيديها فروع وثِمار
وخير على طول يفيض
على قلوب الغلبانين
وشوشها صُبح منوّر
يمسح ضلام الشقيانين
وانت بين دول ودول
إنت فين ؟!
إنت مين ؟!
إنت اللي هيقولوا عليه :
"ربنا يرحمه"
ولاّ انت اللي هيقولوا عليه :
أخيراً خلصنا منّه
كان طين معجون بطين
عاش بيموت ف قرشُه
وراح في غمضة عين