نعش للإيجار بقلم المبدع نبيل الوردانى

( نعش للإيجار)
حد عنده نعش فاضى
حتى لو إيجار قديم
لما يجى يوم معادى
بس شرط يكون سليم
مش مهم يكون مقاسي
مش ح مدد رجلى فيه
أو ح فاصل أو ح جادل
مش ح طول حتى فيه
بس تحفه يكون قديم
أو كمان يكون مطعم
بالنحاس أو حبه أويما
أو مزخرف بالياقوت هو كله أخره موت
ون سألكم حد عنى
قولو صاحبه أصله بيه
ضيف كمان
معاه بوكيه
ورد بلدى فوق عليه
مش مهم يكون صناعى
أو طبيعى
المهم يكون كاسيه
إسمى طبعا
بنط واضح مش خافيه
نفسى حتى ف الجنازه
أبقى أشيك م الجوازه
كنت ميت قال نزيه
مش ملاوع أو لئيم
كنت دوغرى
فى كهولتى
أو ف صغرى
قالو عنى مالوش شبيه
مدح دوت وللا ذم
لما قالو ف وشى دم
والخجل دايما كاسيه
ألف رحمه ونور عليه.
(نبيل الوردانى)