عوالم خفية
========
عوالم خفية دى قصة حقيقية
مش خيالية قصة بنت صغيرة
بضفاير ناعمة على الخدين
حلمها كان كبير جابت ورقة وقلم
فكروها بترسم شخابيط
رسمت شجرة كبيرة
وفرعت منها فروع أملها المستحيل تكبر وتكون فى يوم مشهورة
دكتورة او صحفية أو حتى إعلامية
لونت اللوحة بألوان كتير
رسمت فيها قدوتها
حطت نقط بيضة
لمبادئ وقيم وأخلاق ودين
لما كبرت سقطت فروع شجرتها
كل يوم أمل ليها بيموت
وحلمها أصبح كابوس
عرفت أنها مش حتكون
كرهت الصحافة والاعلام
كله تدليس وأخبار متفبركة
مش حقيقية أخبار تضليل
حتى الأفلام خليعة
حافية على جسر الهاوية
حتى الأغانى صبحت متدنية
قررت تقول وتصرخ بأعلى الصوت
عايزة حقى عايزة أعيش
حرسم من جديد
لوح فيها أمل مش حيموت
جه س.ع و ا. م سكتوها وخرسوها
كله بالقانون وتحت شعار الوطنية
إدعوا أنهم شرفا
مش فاسدين ولاحرامية
ومن يومها مات الأمل
وقطعت اللوح وكسرت الألوان
الشابة العجوزة عايشة إكلينيكيا
علمها أصبح نقطة ضعفها
والجهل بقى هو الصح والفهلاوية
دا حلم البنوته اللى سنها عشرين
وحاسه انها عندها مئة من السنين
وزيها شباب وشابات كتير
ضايعين تايهين مش فاهمين
وحنكتب كل يوم حكاية جديدة ليها وله ولينا حكاية أمل بيموت
لحد م كل شئ جميل ينتهى
حنبطل نحلم خوف من الكوابيس
هى دى خطة التعتيم
هوس بس الحيطان ليها ودان
وكمان عينين إياك تتكلم
كلنا أصبحنا خونة وعملاءومندسين
والفاسدين شرفا ووطنيين
بكره حنحكى قصة جديدة
وخيبة أمل ليك وليها ولينا
نحكى قصة من قصص
عوالم خفية
بقلم / حنان سلام ...
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.