كامل ومكمل
...................................
قاعد عم يجتر الماضي
ويحكي عفلان وعلان
وما خلا حدا من شرو
حتى الماتوا من زمان
فلانة ما كانت إنسانة
وكانت لئيمة كمان
وفلان الله يخرب بيتو
ما بيتأمن عالنسوان
.................
وأم أحمد كانت طفرانة
وكانت تخدم بالبيوت
وما كان في حيلتها اللضى
ولولانا كانت بتموت
وأبو رامي أكبر حرامي
من السرقة عندو حانوت
وأبو نادر أكبر سكير
وأبو سامي أكبر هلفوت
......................
وإنت إسم الله عليك
كامل ومكمل يابيك
تقي ونقي وصاحب دين
وأبدا ما بينحكى عليك
حاجة تحكي عالأموات
وتغضب رب السموات
واتركلي هالناس بحالا
واترحم على كل شي مات
....................
والتهي بقى بحالك
دور على بيتك وعيالك
ولا تحكي عالناس كتير
هالعالم كلا إخوانك
مين منا مالو أخطاء
إدعي لربك يهدينا
وتعامل معنا بأخلاق
هيكة وصانا نبينا
......................................
د . ملك محمود الأصفر
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.