الحافه ..
كل ما اقرب منها تقوللى
انت يا عمو عمرك كام
ابعد وشى واقول معلشى
خللى لبكره كلام يتقال
خايف تعرف ان انا جدو
ويكون ليها عليا ملام
يادى الحيره فى امرى ياربي
اذاى اعشق بس غزال
قولت حشوف عرافه تقوللى
او تقرالى فى الفنجان
قعدت جنبى الست معالى
خبره عمر وليها اجيال
قعدت تفحص فيا وقالت
بعد ما بصت فى الفنجان
شكلك بدر وشعرك شايب
ذاد الحسن وقار وجمال
قولت انا ..شكرا
قالت ..ابدا
اللى بقوله فى الفنجان
ده اللى فى سنك راجل بركه
قولت انا جايلك عش ..عش
قالت عارفه
عايز تعرف عمرك كام
والكام يوم فاضلين من عمرك
عايز تعرف فاضلين كام..صح
قولت انا طبعا يخرب عقلك
قالت ابدا
كله بيظهرفى الفنجان
قمت مشيت وقعدت ادور
كل كلام الست معالي
الايام كده فلتت منى
ولا حترجع تضحك تانى
ماشى وحاسس انى كأنى
فجأه لسعنى الضغط العالى
فوقت لقيتنى قدام بيتها
بأنظر ع الشباك العالى
طل البدر بنور طلعتها
ضحكت ليا..عمو يا عمو
خادنى الشوق وجريت ناحيتها
ضحكت ضحكه يخرب بيتها
وما خلاص بقى ايدى فى ايدها
قالت عمو .... عندي سؤال
اسمح ليا اقول لسيادتك
هوه سيادتك عمرك كام ؟
بقلمى *** محمود طنطاوى
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.