بحب الشتا
**********
بحب الشتا و برده
وافتكر ذكرياتي
وأبويا يجيب القصعه
ويعمل راقية نار تدفيني
ويحط الخشب وقوالحه
وكفوفنا علي وش النار
وحلة العدس أبو جبه
نغرق فيها ونقلبها هزار
**************
بحب الشتا وهدوءه
وافتكر ذكرياتي
واقف في البلكونه
وألبس زعبوطي
وأدخل وسط الأوضه
وأحكيلهم حكاياتي
أمنا الغوله وأبو رجل مسلوخه
ويشدوا في كتفي أحفادي
**************
بحب الشتا وألعابه
وافتكر ذكرياتي
لما اجري تحت المطره
وأغني يا مطرة رخي رخي
يقولولي فين الأغاني ديه
ويفطسوا من الضحك عيالي
أقولهم البركه في المحمول
وزمن توهان العقول
***************
بحب الشتا والدنيا عايمه
وافتكر ذكرياتي
لما كنت أشمر رجلي
وأبلبط في الطينه
وأزروط في هدومي
وأمي تغسلها وهي فرحانه
وتقولي هاملصلك ودانك
أخر شقاوة يا بسيوني
****************
بحب الشتا وزعابيبه
في أمشير وافتكر ذكرياتي
والعفره تعمي عنيه
زي العسل علي قلبي
و وقت الضهريه
أنام وشخر وتشخيري
ولا أجمل سيمفونيه
واخد كفايتي من نومي
*****************
بحب الشتا وأيام الشتا
وافتكر ذكرياتي
لما كنت في الجيش
وكانت أيام تدريبي
دفعة عشرة شهر عشرة
عسكري بطل مايهمنيش
من برد الشتا ياعزيزي
وأقف خدمه زي الديدبان
برنجي وكنجي وشنجي
عيني يمين وشمال
وأزعق بصوتي
ها مين هناك
والهوي يضرب في قفايا
والحركة تدفيني
**************
كلمات بسيوني صديق
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.