في الحزن حياه
ولما عنيكي تندهلي
وتطويني
وتسبيني
وأدوب فيها على مهلي
يدوب شكي
يدوب حزني
وألمس ف سحرها جهلي
وأتحول إلى هيكل من النسيان
وتتلاشى عذاباتي
حدود ذاتي
أنا وببقا كأني ماكنتش
ومايضرش
تدور الأرض ماتدرشي
مابيضرش
تغيب الشمس أو تيجي في عز الليل
وما يضرش
يطول الليل حزين حاير ومايمرش
ومايضرش
تتوه النجوى ف عنيكي
وأتوه منى
ياريت تقدر عنيكي في يوم تخوفني
ياريت تقدر عنيكي في يوم تحزني
بخوفي بكون وبتحرك
وبهرب من طاحونة الموت
ويدفى الدم في عروقي
ويغلى يبخر المكبوت
وطلق الحزن يطويني
يفوت مني
يعذبني
وينحرني
يطهرني
يبخرني وأعيش هيمان
دا أنا أصلي
وطول عمري
بحب الشمس والطيران
وبفرح اني اكون حزنان
وبتألم
وبتكلم
وبعقل
لحد العقل ما بيكبر ويبقا جنان
بحزني بحس بوجودي
وبعرف إن أنا إنسان
بخاف الفرحه ف عنيكي
بخاف الامن
بخاف معرفش ليه منهم بخاف أتجن
جنون أصلي
أصل الجنون أنواع
جنون بيصور الانسان ملاك طاير
جنون الطيف لما الطيف يكون حاير
جنون الغيره
جنون الكذب ويا الصدق والحيره
جنون أصلي
وده أصلي
فوق ريح الجنان ممدود
حاضن جنوني
دافن شجوني
جوه في قلب التراب والدود
جنون أصلي ودايما بيني سدود
بين الأصل والمصدر
ويرسم فوق خدود الوهم
حلم خلود بيتمخطر
يضللنا
يتوهنا
يفهمنا اننا نقدر
بنرسم آل وبنسطر
وبنسافر وبنبحر
جنون ف جنون وكله جنون
جنون أصلي
خالد موسى السيد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.