عــيـــــد شــهـــــــــيـــــــد
_________
العيد يا وطنى
كان يكون
لو انت من قلبك تكون
فعلاً سعيد
مش قادر افرح
والبس التوب الجديد
مع إنى لسة
ما جبتهوش
لكن دة كان
حلم ف خيالى
يفيض فى جيبى حق هدمة
وامشى بين الناس
واعيـِّـد...
ع اللى رايح واللى جاى
بس يا خسارة يا وطنى
يا قاهرنى
كنت اشوفك فوق
وسيـِّـد
كنت اشوف الضحكة طارحة
ع الشفايف
كنت اطمن ..كل خايف
وطنى عمره ..ما ينتنى
ولا مرة من شئ همنى
ولا كسر ضهرى واتحنى
ولا عمر حزنك ..هزنى
دلوقتى حزنى لف بى
ولفنى
من كل حارة ضلع شارد
ضلع متفتفت
وقايد
جوة غزة
قلب سوريا
والعرق والريح تعاند
كل مركب لو تسير
تونس الخضرا بوجعها
واليمن وصداع صدعها
مصر واللى خان وباعها
فين يا وطنى راح نعيش
كل عيد جاى بالمواجع
واللى قال
رايح وراجع
راح ما جاش
دق الطبول
أنفخ بقى ف قلب النفير
دمنا بيروح هدر
دمنا بيضيع بلاش
ألف عيد على عيد ولسة
كل لفتة
كل همسة
طفلى بيصرخ حراااااااام
جبت حتة من دراعه
باقى جسمه فى الركام
حمص شاهدة
وف حلب وف غزة حسرة
ليه يا وطنى الحدود
تصبح محاصرة
بألف نجمة لليهود
فين نجومك يا وطن
كانت تنور ع الخدود
كانت حرس عند الحدود
لم النجوم من فوق كتاف
المسجونين
جوة المناصب والكراسى
محبوسين
واطلق الخيل كلها
راح يبقى عيدك جد عيد
عيد سعيد يا وطن
لو بس تقلع هدمتك
وتلبس التوب الجديد
..............
بـــقـــلــــــــــم ا لـــشــــــــــا عــــــــــــــــر
أ بــــــو عـــــمـــــــــا ر ا لـــمــــصــــــــــر ى
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.