** – قال الزمن – **
وسرحت حبة …
حبتين ……
وجرت إيديا ع القلم .
كتب الألم …
آآآآآآآآآآآآآه م الألم .
حاولت أحبس دمعتي …
نزلت ألوف .
وإتشكلت كلمة
/ ظروف /
وجنبها كلمة
/ قدر /
ضهري إنكسر
مشوار طويل …
ضلام وليل .
/ بكا / عويل /
حكاية شبه المستحيل .
القيم / إتغيرت /
المبادئ في العالم ده
/ إتكسرت /
كلمة ضمير …..
/ إتحطمت /
الغيلان عن نيابها
/ كشرت /
و أخوة ماتت من
/ زمن /
لبست كفن ……
إتحللت بان فيها
كمان / العفن /
و رجعت و حدي …..
/ أنتظر /
نور الشعاع …
يحيي جوايه الأمل
يغزل من الحب الكبير أجمل
/ شراع /
وسفينة حلوة مزوقة …
مفيهاش خيانة أو خداع .
مفيهاش صراع .
ب أحلم ومستني
الشعاع الأولاني .
لجل أرجع من جديد …
أبني تاني .
تصحى جوايه
/ الأماني /
وسألت ليه
أنا ب أتظلم …..
وكلمة الحق ف لساني .
ب أزرع محبة
في كل غيط …
أجني العدم .
أحصد ألم .
في كل حتة …..
خراب ذمم .
وكلام ي كسر
في الهمم .
كل ده ولسه قاعد …
أنتظر أول شعاع .
أتاريني مستني
/ الضياع /
عايش في وادي
/ للضباغ /
مشنوقة فيه كلمة
/ أمل /
مقتولة فيه كلمة
/ عمل /
مدبوحة يا كلمة
/ أمانة /
مصلوبة يا كلمة
/ شرف /
شيك … الوفا …
من فين يا خلق
/ بينصرف /
الحب مات
/ ماااااات /
ولا عدش فاضل غير
/ سكات /
مخنوقة جواه
/ الآهات /
والقطر فات .
شفت الزمن ……
رحت أسأله …
إيه ممكن أعمله ……؟
/ بص / ضحك /
قال لي مستني الشعاع
أنا ح أنصحك
مستني إيه ……..
قلت إنته عارف
/ الشعاع / الأمل /
ب أحلم بكلمة …..
/ حب /
محفورة في حيطان
/ بلدي /
ب أحلم ب كلمة
/ شرف /
ب أحلم ب يوم …
فيه الشيطان
عن نفوسنا
/ ينصرف /
ب أحلم ب موت
/ المرتشي /
لأنه دايما للأسف
بيبص للحر ….
/ ب قرف /
قال الزمن شيئ
/ مستحيل /
قلت له نكسر
/م س ت ح ي ل /
/ بص / ضحك /
قلت نبني المجتمع …
قال لي إسمع …
إبني إنته …..
علم الولد الصغير
علم البنت الصغيرة
في كل بيت …..
في كل حتة .
إحفر الكلمة
/ الرقيقة /
في كل …….
/ سكة /
يمكن شعاعك
/ ي … ت … و … ل … د /
/ يتولد …………..
بقلبي و قلمي
الشاعر / محمد رمضان
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.