ما عاد يفيد الندم
ما عاد يفيد الندم
بعد اللي راح ما راح
لا الحزن بيشفي الألم
ولا النفوس ترتاح
مهما اللسان اشتكى
حتى ان علا بصياح
ما يعيدشي عمر مضى
ولا يسعفه جراح
هوا الحليب لو وقع
ع الرملة لما ساح
تقدر ايديك تجمعه
ولا ف الخيال _ ارتاح
وفر دموعك _ قضى
وارض النفوس بسماح
واوعاك تراهن وتنسى
إن الزمان دا سفاح
==========
حزين على زرعتك
وحصادك اللي خاب
وبعد عمر الشقى
تلقى الحصيلة سراب
مش كل شيء تزرعه
راح تلقى حظك فيه
أو م الثمار تجمعه
يحلى لعينيك تراعيه
بعض المرار تشربه
يشفيك وتسعد بيه
والبعض رغم الحلا
هتعوفه مهما طاب
==========
اوعاك تعيش الندم
أو تقسى على روحك
وتعيش مرارة الألم
وتصحى ف جروحك
مدام بتزرع خير
سيبها على ربك
لو حتى بطرح غير
الذنب مش ذنبك
لا تلتفت لخسيس
ولا لحسود سبك
ولا اللي زاد ع الألم
بالملح في جروحك
اصبر لحكم القدر
لو صار علي جبينك
وامشي معاه وانتظر
وان جار علي سنينك
متقولشي يجدي الحذر
او تمنعه يمينك
بكره الغيوم تنجلي
والحكمه هتعينك
والضيق تاليه الفرج
وتفيض مواعينك
خلي الرضاا مركبك
واضبط موازينك
وكن قنوع بالعطا
وامسك علي دينك
واوعي القنوط يسكنك
وتضيع عناوينك
اليأس ياما هدم
احلام علي عينك
مهما يكون اشكره
وفي حمده تأمينك
بص لكتير قبلناا
خبروا الحياة عننا
آسو كتير زيناا
واكتر كتير فينك
أحمد محمود عوض سعيد
الرحامنة / فارسكور / دمياط
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.