تعظيم سلام للقُرّاء
بقلم : حسام الدين فكري
***********************
إحنا من غيركم يا ناس
أشجار من غير فروع
غيطان من غير زروع
ولا لون ولا طعم
ولا اسم ولا نوع
إحنا من غيركم يا ناس
دهب مدفون تحت التراب
أغاني سارحة في الفراغ
أشباح قُدّام المرايات
إحنا من غيركم بقايا شخصيات
آلات مهجورة فوق مسرح مهجور
كراسي فاضية من غير روح
إحنا اللي ليكم بس بنبوح
ونطلّع اللي جُوّانا ونقول
بحر الكلام من غيركم مقفول
ومصلوب كمان...
على جذوع الملل والخمول
يا ناس عيونكم ميّه وهوا
بتصحّي حروفنا العطشانة
إحنا لمّا نلاقيكم ويّانا
بنطير للشمس والنجوم
وبنرجع ليكم منها بنور
حروف بتنوّر ف الضلمة
تفتح كُلّ أبواب البحور
إحنا كلامنا بنجيبه منكم
من أحلامكم..من آلامكم
م الشوق الساكن ف عيونكم
من القلوب اللي بتنداس
لمّا تعدّي عليها الناس
من غير شفقة ولا إحساس
إحنا قلمكم اللي بيشرح
ويقول ويفضفض ويجرح
أيوه بيجرح بس عشان
يخلّي العيون تشوف
ويخلّي كمان الودان
تسمع أحلى الألحان
بدل الواغش والهري الفارغ
والكلام اللي مابيعملش إنسان
إحنا صوتكم المجروح
إحنا صوتكم الفرحان
إحنا من غيركم ولا حاجة
زوبعة في فنجان !
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.