يا نور عينيه
ياللى اسمك عندى أغلى أسم فى الدنيا ديه
يا حسانى وسمعانى وشيفانى وفى عيونى اجمل صبية
يا أمى أنا ابنك
واحن حضن هو حضنك
ومتربى على حجرك
وخيرك يامه باين عليا
يا أرضى وأرض جدودى وأبويا قبليا
يا تاج على رأسى ولأبنى ولأحفادى معايا وبعديا
يا عمه وعصايا...وزديرى وجلابية وعباية
مليانة نخوة ورجولة وشهامة وعزة وكرامة
يا طرحة وخلخال وحلق بدلاية
وملاية لف وفستانك الستر من الله وليكى أحلى ضحكاية
لأجمل صبية
حره عفيفة قوية
وكلك طيبة وحنية
ومن طيبتك وحكمتك
والدنيا عارفة قيمتك وعارفة قوتك
بقيتى أم الدنيا يا صبية
يا نخلة وساقية وقناية
وبرج حمام لينا غية
يا سترى وغطايا
يا قصرى يا بيتى يا خيمتى ولو عشة يكفينى أن فيكى أمانى ودفايا
يا نخلة شموخها للسما
وجذور عفية ليا أنا
يا ساقية دايرة تجيب لنا خير وخيرها فضل ونعمة من ربنا
يا قناية بالحب وصلانا
وبرحمة رب كريم جمعانا
يا برج حمام محوطنا
هلال وصليب جنحاتنا
مكتوب هنا على باب بيتها
مكتوب هنا على دخلتها
ليك السلام ياللى داخلها
ليك الأمان ياللى قاصدها
عمر بلدنا ما قفلت باب
قاصد خير عندنا تلقاه
عمر بلدنا ما قفلت باب
قاصد خير عندنا تلقاه
أنما لو قاصد شر...ياكلوك ولادها
ويعلقوا رأسك على دخلتها
علشان اللى زيك لو فكر يعرف بلدنا وقوتها
احكلهم يا تاريخ عن جدودى واشجينى
شوقتنى لجدودى ودمعى على خدى من فراقهم
والعرق نازل من على جبينى مغطينى
باسمع سيرتهم
يحن لحمى لمكان ترابهم
امد ايدى وأبوس ترابهم
يمسك عرقهم فى كفينى
احكي لى يا تاريخ..احكى لى واشجينى
بص شوف حيطانك
صوابع جدودك على الحيطان معلمين
بص فى غيطانك
كعب جدك معلم لا قدر عليةه زلزال يشقه ولا مليون فيضان يمحيه
واسأل النيل
بص لأهراماتك وارفع رقبتك للسما
وفكر اى حد وقول مين ذى أنا
#أنا فرع متفرع من فرع والفرع فرعونى
وجذورى ضربا فى سابع أرض والدنيا تعرفنى واصلى من يومى
#والفرع راجع لجذر والجذر هو الأساس والأساس مصرى
#والمصرى عزة وفخر والفخر ليه بلد والبلد مصرومصر مبدائى وأصلى
مصر أرضى وعزوتى ومالى
مصر أمى وجنتى وحضن أمان ليا ولعيالى
مصر أفديها بروحى ويفضل اسمها فى السما عالى
مصر امنا وستنا وتاج راسنا كلنا
#وعلشان مصر
يرخص كل شئ غالى
...................(#مصر_أم_الدنيا)
كلمات
الشاعر
ماهر نسيم
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.