حالة شجن .. حالة فتور
فرح اتسجن .. جوا القشور
متسطحة كل فكرة ليها معني
مخروس صوت الادان جوا جامعنا
واللي واجعنا انكفي ع الخير
ماجور
قلبه اتملا اسف وسف
بعد ماكان مليان طهور
الدمع ناره مكمله
فوق الخدود
العين دموعها بتنجرح
م الابتسامة
بير مدمدم والالم فات الحدود
حالف ماتروي ميته الا الندامة
الارض كارهة زرعها
كأنه شوك بين الضلوع
وليد وفايت حضنها
منداس مابين جري الجموع
غريب فرشاله ضيها
وكأنها ..
جين الامومة عندها
لكل فاجر شدها
والليل بيسرق مننا
سواد عنينا فينطفي
يعتم ضيانا فيختفي
والغيم خفي
ما تشوفه شمس فيتنفي
ف ارض السراب
تاه الامان تاه المكان
وبعد بعيد عن شارعنا
ياللي سامعنا
رقع لنا بأيديك ياريت
ترتق خيوط فارقت شراعنا
جاهلين مانعرف مين سوي
ومين خطف م النور شموعنا
جوعنا قوي
كافر مايرحم جلدنا
م البرد دبنا ودابت قلوعنا
سفينة ضايع شطها
وكلها علي بعضها
كارهه وداعنا
افتح لنا مندل يدل ولا عمل
تخضر بيه رملة ربوعنا
صوت الامام اصبح غُنّيَ
لحنه نشاذ وكلام سوفاچ
ذود صراعنا
الكعبة مابينها وبين عندنا يدوب خطوتين
ولولا نخاف وما نختشيش
كعبة موضة كنا اخترعنا
وارجع واقول ايه ذنب دول
يموتوا فطيس ساعة الادان
مين اللي قال الجنة بالدم تتفتح بيبان
مين اللي قال بايدينا راح ندفن
ولادنا قبل الاوان
لازم نفوق دا يدوب وجودنا
حبة ساعات
يابشر محتاجين حبة ضمير مع
حبة ايمان
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.