بتوحشينــــــي؟؟؟
ايوه بتوحشيني
هو انتي لسه جايه تسأليني
انا عارف ان انتي
داريه باللي بيا
وبالشوق والحنين
اللي ماليين عنيا
حتي لوماكنتيش
بتشوفيني
مين اللي قال
ان البعيد عن العين
يبقي عن القلب بعيد
دا البعيد عن العين
بيبقي ساكن القلب اكيد
انا عارف انك فاهمه كلامي
وانك اكيد مصدقاني
علشان اللي فيا فيكي
الشوق اللي ساكن عنيا
برضوا ساكن عنيكي
واسألي قلبك وهو يقولك
انك دايما بتوحشيني
وان صورتك سكنه روحي
وما بتفارقشي عينــــــي
اسأليه وهو عارف
لانه حاسس بيا وشايف
وانه برغم بعد المسافه
بس برضه هو عارف
انك... بتوحشيني
واني باشوفك حواليا
في كل حاجه حلوه
فى كل لحن وكل غنوه
واني باشوف صورتك
في كل الوشوش
باشوفها ويا كل ضحكه حلوه
في كل بسمه وفي كل فرحه
في ضحكة الطفل البشوش
باشوفها في السما وهيا صافيه
باشوفها في ورده حلوه
فوق وش الميه طافيه
باشوفها لما ابص للسما
والاقي فيها البدر والمح
عينك بتيجي في عيني
واشوفك وتشوفيني
وبرغم كل ده
برضوا بتوحشيني
**********
كلماتي/السيد محمود محمد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.