يا مغنواتى قول
احمد السعيد الفقى
يا مغنواتى غنى
قول وسمعنا
العمر ضاع منى
وحياتى بلا معنى
وإن كان غناك بيألمنا
وبيصحى أوجاعنا
بس بيفهمنا
حقيقة أوضاعنا
بيعرفنا مين اشترانا
ومين اللى باعنا
عينى عليك ياجدع
زرعك كان لسه أخضر
فرعك ممدود للسما
ويدوب لسه هيزهر
هجم عليك الجراد
أكل اليابس والأخضر
سبع سنين عجاف
لا زرع نبت
ولا سما بتمطر
والكل بعينه شاف
ومين عالفساد يقدر
السبع لما وقع
كترت السكاكين
الكل بدمه انتفع
إلا هو يامسكين
برئ ودفع
من عمره سنين
راح ضحية الجشع
والمسئول مين
الخوف جوانا كبر
بقى زى الغول
ولا حد فينا قدر
ينطق بكلمة ويقول
تبقى مغامرة
وخيانة ومؤامرة
وعدا الخطوط الحمرا
واللى يعديها يموت
الحل فى السكوت
سكووووووووووووووووت
ولسانك ده
تحطه جوا تابوت
وترميه فى أبعد صحرا
احمد السعيد الفقى
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.