شايف سفينة في غرق
شايف سفينة في غرق
تايهه في مهب الريح
الموج بيلعب بها
و الصاري مال هيطيح
نخر جدارها الصدى
و اتاكلت الكوابيح
جر السفه هلبها
ساقها الهوى مراجيح
دفه الصراع هدها
مابين عراك و نطيح
ايدين بتبنى وطن
وإيدين فى هدم صريح
ركاب نحلها الشقى
والهم فاض تباريح
بينادوا طوق النجاة
وأهل الرجا بتزيح
ربان يلبى الندا
مصر الفدا بتصيح
غارت وحش العدا
قطعت دوربنا رميح
لما الذئاب يمهـــا
تنهش فى كل جريح
اصحوا الطوفان ابتدا
جى بدماره مسيح
بصوا بعنيكوا اشهدوا
والا عقولكم ميح
سقطت بلاد وانتهت
وشعوب شتات بتسيح
وازاى ومين يعصمك
والموج عداك والريح
والله ان غفلنا ووصل
معاد أذان هيصيح
ولا عليل له نجا
ولا نجاة لصحيح
الله فى عون ابننا
ابن بلد بصحيح
لكن محاصره الوغش
والملاحين مكاسيح
رمينا له همنا
وفضينا للتشريح
نستنى سقطة ذلل
نشعلها نار ونويح
لا ايد تمد فى بنى
ولا صوت يغنى فصيح
نهدم فى عزم الهمم
ونعوق التصحيح
سوقنا بينا الدجل
والخفة والتفتيح
واتنحى عقل الهدى
واتغيبت مصابيح
وان عشنا ع الفهلوة
نبنى لبلدنا ضريح
وسماسرة بإسم الوطن
صوتهم غثاء وفحيح
طفحوا دمامل كتر
سال من لعابها القيح
زرعوا ما بينا الفتن
وعمروا التسليح
سوق النخاسة فتح
والدلالين بتصيح
للبيع يا شارى وطن
بإيدين ولاده زبيح
خايف عليه الغرق
ويقطعوه لصفيح
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.