إعتدت غيابك والفُرقه
وبقيتِ معايا منتيش فارقه
خليكِ يا حلوه على هواكِ
هتجيني دموعك في عنيكِ
خليكِ يا حلوه على هواكِ
هتجيني بتبكي وبحُرقه
إعتدت غيابك والفُرقه
إعتدت غيابك والفُرقه
ومين قال إني لسه بحِبك
ومين قال إني أنا مُشتاق
وإيه تفرق حياتي معاكِ عن بُعدِك
فُراق بفُراق وأنا مرتاح بعيد عنِك
يا راحه هناك ومش راجعه
هتموتِ م البرد والسقعه
وهتحنِ لدفي أحضاني
وهتلفي عشان تلقيني
أو تلقي لحُضني بديل
لكن بُعدك أنا قلبي ملوهش مثيل
ومهما تلفي وتدوري
عشان تلقي لطريقي دليل
لا يُمكن مره هتلاقي
مفيش إنسان
بيهجُر نعمه وتدومله
مفيش إنسان بيرسم
حِلمه ع الرمله ويتحقق
مفيش قُبطان بيعمل
م الورق مركب وينزل نيل
ومفيش إنسان
يقول الشمس سابت الشرق
وطلعت ليا م المغرب
ويحكي حكاوي تتصدق
أنا الأصدق أنا الأصدق
أنا الأصدق في كُل حياتي وياكِ
أنا الأصدق وأنا في بُعدك وأنا معاكِ
أنا الأصدق عشان عارفِك
ف متلفيش على رجوعِك
ومتكدبيش على روحِك
وتجيني يا حلوه بدموعِك
بحِجة إن أنا واحشِك
أنا نسيتك
أنا سيبتك ومش عايزك
أنا سيبتك ومش عايزك
كُنتِ أحلاهُم زمان
لما كُنت زمان أحِبك
بس مات الحُب بينا
ومن كُتر حُبي خلاص كرِهتك
كُنتِ ليا كُنتِ ملكي
كُنتِ ملِكه في عرش صدري
و ف عرش فكري
بس فات الوقت بدري
كُنتِ ملِكه لكن عُزلتِ
وصرتِ أوحشهُم كمان
كُنتِ أحلاهُم زمان
فاكره زمان
لما كُنا ب الساعات نسهر سوا
لما كان لو حد فينا في يوم تعب
التاني ليه يصبح دوا
فاكره زمان ولا نسيتِ
لو نسيتِ أنا لسه فاكر
فاكره زمان ولا نسيتِ
لو نسيتِ الماضي عادي
هي عادتِك ولا يعني هتشتريها
الغدر والنسيان في طبعك
والجميل نكراه تملي
وعادي يعني إيه اللي فيها
حبيت في واحده ما تستاهلش
وحبي ليها خُساره فيها
ضحيت بعُمري عشان عنيها
وهي ضحيت بيا عادي
وفاكره إني هموت عليها
وبسببها عُمري راح
يا هم تقيل علي قلبي لكِنه إنزاح
خلاص رُحتِ وزمانك راح
وراح الحُزن وياكِ
أنا في حُبك ده كُنت أسير
وعايش عيشة المساجين
أنام بيكِ وأقوم بيكِ
وأكتب شِعر في عنيكِ
وأتوه مني وأتوه فيكِ
وألاقي نفسي جواكِ
صِفر علي الشمال مركون
أنا في حُبك ده كُنت أسير
وخلاص الأسير بقي حُر
وسجنك ليا بقي بستان
وأرضه براح منيش مسجون
وأنا مش ضعيف
ده أنا في الأساس أصلي جبل
وفي الوجود
ماتلاقيش مني الكتير
ده الجبال بتشكي قسوة قلبي أنا
صخر وحديد من جديد
كُل يوم بيتبني
مليش عزيز والقريب مني بعيد
ولا عُمر ريح بتهزني
مرفوعه راسي في السما
ولا عُمر حد زلني
وحُبي ليكِ كان ده إختياري
كان هو رأيي وكان قراري
وأنا اللي أقرر إمتي أسيبك وأهجُرك
وماتزعليش
أنا أصلي مش باكي عليكِ
أنا في الأساس أنا كُنت بايعك
ولا عُمري مره هكون شاريكِ
ولا أحس مره في بُعدي عنك يوم بوحده
ولا إني تنزل دمعه مني في يوم عليكِ
وأنا مش ضعيف
ده أنا في الأساس أصلي جبل
وفي الوجود ماتلاقيش مني الكتير
أنا قلبي حَجر وإن كُنتِ مني
بكُل قسوة هدوس عليكِ
وماتزعليش
م أنا أصلي مش باكي عليكِ
إنتِ ب النسبه لي عادي
إنتِ زيك زي غيرك
في الكون ده منك فيه كتير
واللي فيهُم برضو فيكِ
وأنا مش ضعيف
ده أنا في الأساس أصلي جبل
وفي الوجود ماتلاقيش مني الكتير
ومفيش رجوع
مهما الدموع منك تسيل
لو حتى كانت
زي موج البحر الأحمر
ولا حتى زي النيل
أقصر طريق بيني وبينك
يجي مليار ألف ميل
وإنتِ يا عيني مُكبله
والطريق واعر طويل
وفي النهاية حيطه سد
والوصول شئ مُستحيل
أفضل طريق يا بنتي ليكِ
تلمي هدومك من سُكات
لمي هدومك من سُكات وإتوكلي
وإتئملي كُل البنات وإتخيلي
مين يا ترى هتيجي تاخُد
في يوم مكاني مين يا ترى؟؟؟
لمي هدومك من سُكات
وإزعلي وإتندمي
على كُل لحظه في عُمر فات
وماتدمعيش ولا تضحكي
دمعك خلاص مبقاش يفيد
والضحك حقد
لمي هدومك من سُكات
م أنا قولتلك ماتعندنيش
أنا في العِناد ماليش مثيل
ماسمعتنيش
وقولتلك ماتغلطيش
وإن غلطتي إتعلمي
وماتكرريش نفس الغلط
مافهمتنيش
وعيشتي عِند
خلي العِناد بقي ينفعك
وشوفي غيري يسمعك
تغلطي ويستحملك
وتزعليه وما يزعلك
خلي العِناد بقي ينفعك
ولمي هدومك من سُكات وإتوكلي
وماتفكريش إني خسِرتك
وف بُعدك إنتِ هعيش زليل
ده أنا بُعدي عنك مكسبي
وقصيدتي دي أكبر دليل
(((.. مصطفي دسوقي..)))
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.