عارف
لما تحس إحساس حد
مش حاسس بطعم الدنيا ولا لونها
ولا يوم حد كان حاسس بإحساسه
ولا أصحابه ولا أحبابه ولا ناسه
وعايش في الحياة ضايع
لكن عايش لكن عايش
وشاري الكُل مش بايع
برغم الكُل كان بايعه
عارف
ساعتها بتبكي من قلبك
علي وجعه وعلى ألمه
وعلى حِسه اللي جواه
كاتمه مش سامعه
عارف
أنا حسيت بكل الناس
ولا يوم حد كان حاسس بإحساسي
ولا يوم حد كان فارق معاه حالي
ولا يوم حد كان مُهتم
فبكيت من حالي علي حالي
وعلي اللي بسببي أنا جرالي
وخرجت مني كام كلمه وأنا ببكي
تدُل بإنِ شايل هم
حسيت بيا كراستي فنداهتلي
وقالتلي تعالي بتقول إيه
منيش سمعاك
تعالي وقولي إيه جواك
تعالي وقولي ماتخبيش
ولا تقوليش بإن مفيش
آهاتك وانت بتتنهد
تهد في بُرج متشيد
وخرير الدمع في عيونك
علي خدودك بصوت مُتعدد
تعالي وقولي إيه جواك
ده أنا أكتر حد حاسس بيك
وأكتر حد يسمعلك
حسيت بيا كراستي فنداهتلي
وقالتلي تعالي بتقول إيه
منيش سمعاك
تعالي وقولي إيه جواك
فروحتلها روحتلها وقولتلها
ودمعي في عيني كان شلال
نازل مني على سطورها
نداهتلي فروحتلها
روحتلها وقولتلها
بإنِ تعبت م الدُنيا وعمايلها
ومن أحزان أنا شايلها
ومن ناس عايشه تجرحني
ومن ناس فيها زاد عشمي
وخدعتني
ومن ناس بيها أنا مُهتم
ولا إهتمتش ولسه هكمل
قالتلي اسكت وماتكملش
داري الدمع في عيونك
واستقوي ولا تضعفش
ماتستخشن
ماتستخشن وتسترجل
وتتقوي وتتحمل
وإيه كان جد
ما طول عُمرك حياتك
صعبة فوق الحد
وطول عُمرك
كُل ما جرح فيك بيلم
يعيد الكره م الأول
وإيه كان جد
ما طول عُمرك حياتك
صعبة فوق الحد
وطول عُمرك
بتتصبر وتتجمل
زاد الدمع في عيوني
وقولتلها صحيح متحمل
ومتصبر ومتجمل
لكنِ خلاص تعبت بجد
لكنِ خلاص تعبت بجد
ومتشوكة كُل السُبل
والناس تشوفني تقول جبل
لا هزه ريح ولا الزمن يوم غيره
ولا حاجه بتقصر عليه
ولا عُمره كان فارق معاه
موت أو حياة
الناس بتاخد بالمظاهر
ب اللي من بره الجدار
ومش مهم في قلبك إيه
نسيوا إن القلوب أسرار
صحيح من بره زي قالوا
صحيح من بره زي ما قالوا
لكن جوايا شئ تاني
ماتخدوش الأمور من بره
وبصوا جوه لو مره
هتلقوا إن الحياة صعبة
وزي ما ضحكتي حلوة
جراحي في قبلي أنا مُره
صحيح جوايا أنا أسيرها
لكن جوايا دي حُره
بتجري جري في عروقي
وبتزود لهيب شوقي
لموتي الليلة عن بُكره
أنا دسوقي على فكره
وللذكرى
أنا كُل قصايدي مش ناكره
جراح قلبي اللي جواها
ومحلاها
محلاها قصايدي في بُكاها
علي جراحي وعلي حالي
ومحلاني
محلاني في فُرجتي عليها
وهي دموعها في كفوفي
بتحلالي
(((.. مصطفي دسوقي..)))
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.