((( الحياة دون رتوش )))
بقلم الشاعرة شيرين قزامل
🌱🌱🌱🌱🌱🌱🌱🌱🌱🌱
العمر بيعدي بسكات
من فينا عايش من فينا مات
كل حاجة في عمرنا
ليها يوم تكون فيه ذكريات
وانا وحنيني في بحر شوقي
غرقانيين من سنيين
والموج له معانا حكايات
حتة مني في البعد عني بحن ليها
بس قدري اترسملي
اكون في سكة وهي في سكة
وقلبي يغلي من الآهات
هي دنيا وكل واحد بياخد نصيبه
ورحلة حياته ملهوش فيها اختيار
مرة نفرح ومرة نزعل
ومن اللي فينا نرقص على جمر نار
ليه يا دنيا مغرباني عن نفسي
ومحيراني ومعجزاني اخد قرار
نفسي تاخدي مرة مني كارت أحمر
وأعلن عليكي الانتصار
نفسي مرة أتحدى ضعفي. واملك مصيري
ويكون بأيدي القرار
حتى لو كان قراري انتحار
ليه يكون طريق المحبه
نهايتة ذل وانكسار
الحياة بجد قاسية ومتوهانا في المسار
اللي عرف يعيشها هو اللي داسها
واخد حقه بدراعه ومعملش اعتبار
غير لنفسه ومن بعده يكون الطوفان
واللي حاول يعيشها مبدأ
يا عيني عليه طول حياته في انهيار
اد ايه حياتنا وحشه لو مسحنا عنها
زواقها وزيف كلامها هنشوف عجايب
يارب سلم من الدمار
في ناس قوية ومفترية
واخدة اكتر من حقوقها
وفاردة قلوعها في انبهار
وناس غبية زي حالتي عايشاها مثل واعتبار
وناس اختارت تعيش ضحية
وكانت حياتها مسرحية هزلية
ورافضه تعلن النهاية وتشد الستار
وناس محايده راضية بحياتها باللي فيها
فردت جناحها تطلع معاها تنزل معاها
اهي عيشة باختصار
زوال يا دنيا بكل اللي فيكي
مهما طال الانتظار
لازم أعيد حساباتي
عمري هعيشة مره واحدة مش الف مره
هقول يا نفسي ثم نفسي ثم نفسي
زي غيري وده قرار .........................
🌱🌱🌱🌱🌱🌱🌱🌱🌱🌱🌱🌱🌱
بقلم
شيرين قزامل (( مصر ))
2017 / 6 / 5
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.