يا ساتر استر من دخول الحاره
دا العتمة هلت والإدينا جراره
التهمة ثابتة وباينه زي مناره
ماشيين غلط وكسرنا كل إشاره
يا ساتر استر من دخول الحاره
عينينا دمعت لموت الحبيب والجاره
دا الدنيا ولعت في البشر وحجاره
التهمة ثابتة وباينه زى مناره
قطر انتحر وفاكرها كدا شطاره
يا ساتر استر من دخول الحاره
رسوم دخول وخروج لكل الماره
وضريبة ثابتة على السكن وعماره
والعيشة غليت وكل البشر قرفانة
وبيرنا نشف وبان للجميع دا قراره
يا ساتر استر من دخول الحارة
يا ثورة ما تمت دا الغلابة خسرانه
وديابة طلعت تاكل فينا سعرانه
الشك نخور في العقول بمهاره
والود هاجر للنفوس بإشاره
يا ساتر استر من دخول الحاره
فرق ما بينا اللي همه إماره
والنخوة سافرت للخواجة إعاره
هم الجميع الستر بس في داره
ميهمهوش النار اللي ماسكة ف جاره
يا ساتر استر من دخول الحاره
دعانا لسة ما شفنا طعم ثماره
وشبابنا همه سلفي ويا سيجاره
ليلاتى نسهر نشوف الشيطان وانفاره
عمال يكسر في الوصال ووصاله
ويشيل قلوب ويحط مكانها حجاره
يا ساتر استر من دخول الحاره
فين العروبة دا الشعوب محتاره
الأقصى يصرخ من دنسوا جدرانه
وفراتنا ينعي وحدته وقيثاره
وف سوريا طفوا النيران بنيرانه
ويمنا تايه ما بين مسلميه وكفاره
وف ليبيا نسيوا شيخ الجهاد مختاره
وبقت شعوبنا على جرف هار حاله
يا ساتر استر من دخول الحاره
دا العتمة هلت والإدينا جراره
......وائل سعيد .....
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.