لون الغيوم
---------
بعيدة قمرتنا يا حبيبتي
وضباب ملامح النجوم
تفاصيل سمانا مبهمة
ووشوشنا لون الغيوم
يا هلترا ابتدا الضياع
يا هلترا ابتدا الوداع
ولاّ اللي بينّات ضاع
ولاّ الطريق مش طريقنا
ولاّ الزمان مش الزمان
لو في يوم ضعت منك
إذكريني قصة جميلة
وارسميني جوّه ننك
صورة ماتكونش مستحيلة
في الحقايق والأحلام
في السكوت والكلام
في الشموس والغيام
في كل اللي كان بينّا زمان
يمكن تكون دي المرّة الأخيرة
يا حبيبتي وإيدينا تفترق
يمكن تكون اللحظة الأخيرة
تحت القناديل في المفترق
فيه حاجة بينّا بتنكسر
فيه نغمة تايهة عالوتر
فيه حرف في قلوبنا اتسطر
وحتنتهي القصة قبل الآوان
ملامحنا مش دي ملامحنا
تفاصيلنا مش نفس التفاصيل
بينا المسافات الطويلة
بينّا شىء م المستحيل
حتى الطريق مطر وريح
وجريح بيحضن جريح
ودموع بتستبيح
تصبح مطر عالمكان
زمانّا ما كانش لينا
طريقنا مكانش لينا
ولا كانش لينا إلا الهموم
بعيدة قمرتنا يا حبيبتي
وضباب ملامح النجوم
تفاصيل سمانا مبهمة
ووشوشنا لون الغيوم
***
بقلمي / عادل عبد الرازق
-----------------------
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.