..............أفكار بالية...............
كنت مفكر يوم ما اتجوز
....... إنى هعيش وأموت مرتاح
والأحزان هتفارق بيتنا
.......... ويجى بدالها كتير أفراح
إلا وقامت قلة بثورة
..........تركت يومها ألام وجراح
خلت حتى الجاهل يفتى
............ كأن المفتى تركنا وراح
قالوا جوازك باطل باطل
........ وليلة الدخلة ما ليها صباح
علشان إللى ببفرح كافر
............ لو بيته نور فيه مصباح
ولا يطبل جوة الشقة
..............ولا يقضى ليالى ملاح
وإنت مليت الحارة كراسى
............. والأطفال قلبوها صياح
ورحت كمان وحلقت اللحية
........ والفوزلين على شعرك ساح
وكمان شغلك شغل حكومة
............ودخلك كله من الأرباح
قلت يا بيه أنا راجل مسلم
.... وبفكرى الراقى واخدلى جناح
أعبد ربى ومؤمن إنه
..................هوه الرازق والفتاح
لما أنا باغلط وابعد عنه
............وارجع تايب عنده سماح
أما تيجنى بأفكار هابطة
.............وتكفرنى عشان انزاح ؟!
تبقى غلطت ف حق ديانتك
....... وتبقى حياتنا مافيها نجاح !!
قوم يا حبيبى استغفر ربك
............باب التوبة فسيح وبراح
وانسى فتاوى الجهل الماضى
............فكر المسلم خير وصلاح
وبلاش تملا حياتنا فسافس
............ إصلاح نفسك دا الإصلاح
وارحم كل الناس من فكرك
...................الى بكل قيامنا أطاح
واسعد وافرح دايما لينا
................ لما الليل يطلع له صباح
وبطل نقد وتقطيم فينا
.................إحنا شبعنا نباح و نواح
.................مع تحيات..................
..........محمد جمال فايد..............
......جمهورية مصر العربية.............
....كفر شبرا زنجى الباجور منوفية..
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.