خواطر رجائيه عاميه لملمونا، بقلم رجاء عبد الرازق
،مجاراه للشاعر الكبير د محمد ضباشه الحقونا
لملمونا لملمونا
في ناس كتير قطعونا
إلحقونا يا خلق هوووه
أنا من الفقر اقووول أيوووه
هقطع همومي ما هي هلاهيل
انا منقوع في هم وويل
أعمل إيه الدنيا بتروح
وأنا معاها بنوح علي نوح
حد يقولي اعيش إزاي
وقرش رايح وقرش جاي
و الفول رفض الفطور
وبقي متكبر قوي ومغرور
والعدس بقي غالي ومامول
وشبعنا من الكلام المعسول
أنا مش لاقي العيش الحاف
ويقولوا نام و شد اللحاف
واشوف قدامي شقق بالملايين
والدفع فوري وناس مبسوطين
وأنا خيبتي بقت قويه
ومش لاقي لا بطاطس ولاطعميه
وولادي نايمين من غير بطانيه
مايعرفوش العيشه الهنيه
الفقر اكل مني وشرب كمان
وأنتم اعتبرتوني مش انسان
انا عايش معاكم في خبر كان
والكرش بتاعكم بقي مليان
إرحموا ضعفي وقله حيلتي
وحد يجيب مره في سيرتي
أنا خلاص قربت أكاكي
وكرهت الدنيا وكرهت ذاتي
قولي لي اعمل ايه في حياتي
انا بصرخ و بتزيد اهااااتي
مكتوب عليا الهم والويل
وفيه ناس تغني ياعين ياليل
فيه ناس بتلعب بالفلوس
واحنا معاكوا حظنا منحوس
لو ينفع أموت كان أحسن ليا وليكو
عيشتوني حي ميت علشان ارضيكو
ياريت تضربونا بالرصاص
زي خيال الحكومه ولا فيش قصاص
يارب إرحم ذليل ضعيف
عاوز يعيش مستور ونضيف
بقلمي رجاء عبد الرازق
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.