خايف عليك ياوطن
==========
خايف عليك ياوطن
م الكدابين
من تجار المِحن
م الغشاشين
اللى تاجروا بأى شىء
حتى المصايب والبلاوى
اللى باعوا كل شىء
حتى التراب عملوه حكاوى
حتى الخراب خلوه غناوى
يتغنوا بيها ف شدتك
ويرددوها ف أزمتك
خايف عليك ياوطن
من اللى يسرق قوت ولادك
واللى بيِقَتِل شبابك
والى يِهدم ف اقتصادك
ولا يتمَنىَ خرابك
خايف عليك ياوطن
م اللى خانوك
وف لحظة الجد سابوك
دول غدروا بيك
حاولوا كمان يدمروك
وف سكتك زرعو اللغم
فوق الرايات حرقوا العلم
هدموا الكنايس والمساجد
ع اللى راكع واللى ساجد
ولا خافوا حتى ربنا
ولا حسوا بدموع أهلنا
على الشهيد
واللى كمان أصبح شريد
ويقولوا إحنا مظلومين
دول سفاحين ومجرمين وقَتَالِين
هوا اللى يَقتل يبقى إيه يَعنى جَزَاه ؟؟؟!!!
اللى شَرَعُوا ربنا ف أعلا عُلاه ؟!
================
( محمد عنـانى )
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.