قصيدتي الجديدة وهي هدية مني الي امي بعد وفاتها
الله يرحمها هي وابي وامواتنا جميعا
تم توثيقها قبل النشر
............
كيف انساكي
للشاعر رضا ابو شنب
ميت غمر
٢/٠٨/٢٠١٨
.................
كيف انساكي يا امي
انسي جسمي اللي منك
انسي نفسي ولا دمي
كنت في بطنك ضعيف
وانتي يا امه شايله همي
كنت ما اعرفش الرغيف
ولا ميه تخش فمي
كنت جواكي كفيف
وانتي تمشي غصب عني
لما منك خرجوني
كنت ابكي بالصراخ
رجعوني لبطن امي
لما قطعو الحبل بينا
كنت فاكر اني هجري
التقيت مكتوب معاه
اهدي يابني لسه بدري
انت في بداية الحياة
بكره تبقي قطر مجري
كان سريري هو رجلك
لما اجوع تديني صدرك
وتداريني جوا حضنك
حتي لما يدق قلبك
كان معاه يدق قلبي
لما كنت تغيبي ابكي
وترجعي افضل اغني
لما كانو يخيروني
بين ابويا وجنبه عمي
كنت اغمض عيني حبه
ثم اختارك يا امي
............................
كنت بناديكي حبيبتي
لما فيكي شوفت صورتي
وفي عنيكي لاقيت ملامحي
حتي طيبتك زي طيبتي
قلبي دايما بيناديكي
مرة امي ومرة اختي
لو في يوم جابو في سيرتي
كنتي يا امه تردي غيبتي
حتي لو مرة اخالفك
مافي مرة كنتي تدعي
لو يطول مرة غيابي
كنتي يا امه علشاني تبكي
وتقولي لهم مهما يبعد
مهما يعصاني دا ابني
هو من لحمي ودمي
كان بياكل جو بطني
كنت افرح لما اشوفه
كنت احزن لما يبكي
كنت اسهر الليالي
لو في مرة كان بيشكي
حتي لو زعلان في نفسه
مش بسيبه غير ما يحكي
............................
والايام بسرعة مرت
والمرض صابك يا امي
كنت يا ريتني مكانك
ويفدوكي بكل دمي
ياخدو مني كل حاجه
بس تتعالجي يا امي
وترجعي لنا بالسلامة
لوتمن شفاكي عمري
المرض بسرعه يجري
وانا عنك كنت اخبي
قالو نقطع رجلها
خد قرارك يالا يا بني
مش بكيفي اني اوافق
الموافقة غصب عني
كنت بتمني بقائك
والدموع في القلب تجري
رغم الامك يا امي
كنتي بعنيكي تصلي
وانتي بتبصي في عيني
كنتي بتدعي ليا ربي
انه يسترني في حياتي
ويبارك لي كمان في ولدي
........................
يوم وفاتك ياحبيبتي
التقيت الدنيا ضلمه
والحياة اتغيرت
والتقيتها يا امي مره
كل واحد راح لحاله
و احنا كنا بيكي لمه
رغم حقد الناس علينا
كنتي لينا احلي جنة
لما يجو في يوم علينا
كنتي تدعي بكل ذمة
اللي يجي ويعادينا
يبتليه ربي بحمة
كنت تدعي تمللي لينا
ربي يبعد اي غمه
ويراضينا في حياتنا
ويعافينا ويعفو عنا
واحنا لسه بندعي ليكي
يرزقك ربي بجنة
تشربي من ايد نبينا
والصحابة والائمة
تحت اقدامك يا امي
القي نفسي جو جنة
كيف انساكي يا امي
رضا ابو شنب
مصر/ ميت غمر
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.