ما تحلميش بالرجوع
------------------
بقلمي - عادل عبد الرازق
-----------------------
ما تحلميش إني اكون
نادم بيحلم بالرجوع
ما تفكريش إن قلبي
ريح بتكسر في الضلوع
صدقيني محال أنا
أقبل أكون ليكي شهيد
...
فارس ومحني جبيني
خايف سيوفي وحصاني
أدخل مداين حنيني
ألقى حصاني رماني
وانهزم رغم انتصاري
واحاول ابدأ من جديد
صدقيني محال أنا
أقبل أكون ليكي شهيد
محال أرسم مشاعري
جوّه أرضك ألف لون
والفى مشاعرك جليد
يدوّب مشاعري ويخون
حرارة لهيبي ف عواطفي
تصبح برود على صديد
صدقيني محال أنا
أقبل أكون ليكي شهيد
...
ذكرى هزيمتي ف مداينك
لسه في قلبي دموع
لا قادر اسبح في بحري
ولا عارف افرد قلوع
مقدافك يا قلبي انكسر
والغرق جاي من بعيد
صدقيني محال أنا
أقبل أكون ليكي شهيد
...
ما تحلميش إني اكون
نادم بيحلم بالرجوع
ما تفكريش إن قلبي
ريح بتكسر في الضلوع
صدقيني محال أنا
أقبل أكون تاني شهيد
رغم الهزيمة عمري مااحلم
ترجع قواربي لبحورك
رغم ضلامي عمري مااحلم
بقناديلك ولاّ بنورك
عمري ماندم عاللي كان
وأدّ ريحي ولو تزيد
صدقيني محال أنا
أقبل أكون تاني شهيد
****
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.