( راضية ومرضية )
~~~~~~~~~~~~~
زي أهل زمان
أبويا كان طمعان ...
يجيب م الولاد دسته ...
وستي بالواسطه ...
قالت كفايه كده
وصل العدد سته ...
تلاته ولاد وتلاته بنته
وستي كات شاطره ...
كان فيها شيئ لله
ربتنا ع الفطره ...
وابويا على نهجها
ماشي بأمر الله
وانا منه باتعلم ...
تتبع خطايا خطاه
ولما الزمن سلم ...
على وشها وعلم ...
عدى وساب ذكراه ...
وابويا يحضنها
عشان يطمنها
تفرح تقول الله ...
ولما اجي أحضنها
وابص في عيونها
تفارقني قولت آآآآه
ويلاقي قلبي دواه ...
وتضمني ضمه
وابويا كان يسمع
يقول لها يامه ...
الواد بيدلع ...
تقول ياواد مالك
غيران وهتولع ...
تضحك وتتبسم
وتقول ياواد قسم ...
إلبس كدا وارسم ...
ياروحي وعنيا
دا اللمسة من إيدك
بتزيدني حنيه ...
والنظرة من عينك
لجرحي مداويه ...
وعدت عليها سنين
من العدد ميه ...
والأصل مش بالكلام
الرك ع النيه ...
حست طلوع الروح
ندهت عليا في يوم
تلزمني بوصيه ...
قالتلي لما أموت
مش عايزه أسمع صوت
ولا عايزه أسمع زيطه ...
خليني أدخل قبري
وروحي مبسوطه ...
أنا عشت بينكم عمري
راضية ومرضيه ...
وقف الكلام في الزور
محشور رفض يطلع
والقلب كان يدمع ...
ومشينا ف المشهد
وربنا يشهد ...
سمعنا زغروطه
مظبوطه ع النيه ...
كأنها زفه
وعروسه متحنيه ...
وهيى بتودعني
بنظره من قبرها ...
نسيت ترجعلي
أمانه كات عندها ...
كات روحي في عيونها
وخدتها حنيه ...
كات روحي في عيونها
وخدتها حنيه ...
~~~~~~~~~~~~~
بقلمي الفلاح الفصيح
معوض حلمي
منشأة بطاش
تمي الأمديد
دقهلية
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.