كلميني
يا حبيبتي كلميني
وزي ما انا عايشك ...عيشيني
وزي ما بنصرخ عشانك
إصرخي لجل تلاقيني
دا انت ارضي وانت عرضي
وانت اللي غاويه تمرمطيني
*****
يا حبيبتي فين كيانك
ليه يُملُكك بس اللي دانك
ليه ضنايا يموت عشانك
وانت ف أحضان اللي خانك
بتزرعي بس ف انيني
****
كلميني ....
ياللي خدتي روحي منى
ياللي من حبك بغني
ياللي حافظاكي روموشنا
وأنت جوه في قلب نني
ياللي صار على طول ترابك
بيرتوي بالدم مني
****
كلميني .....
فين أمانك
فين اغاني السلم
في الزمن اللي هانك
فين عنيكي وفين ودانك
فين عقول الشعب
اللي بتغني بإيمانك
****
كلميني واوصفيلي
ايه شعورك
لما يرجعلك ضناكي
جوه نعش الموت بيصرخ م الالم
وقلمك رصاص
لما يكتب نفتكر
وبيتمسح خطه وخلاص
الصرخه جوه النعش
مش صرخة ندم
الصرخه صرخة جسم
م الغدر اتعدم
الصرخه صرخة حلم
جواكي اتهدم
الصرخه صرخة ابن
حاسس أنه ضاع
جايلك وناقص
كام صباع
ف الكف من غير الدراع
ومفيش قدم
والباقي كومة لحم مقطعه ومتفرقه
والكل قام يصرخ بقا
على جته جايه مخربئه
ومفيش أمان
****
فين الحنان
فين نور عنيه
فين اللي هيقرب لها
هيتمسح م الدنيا ديه
****
فين الكلام المر
واللي طاليه العسل
فين المنحنح
واللي نحنحته بصل
فين النبي
اللي ضربوبه المثل
فين الضنا
اللي في الغُسل إتغسل
فين الولد
اللي وسط الموت وصل
اللي الرصاص
قام مزعه
والغدر دبحه وقطعه
والحق مين هيرجعه
ومين اللي بس بيدفعوا
للي علينا اتمرقعوا
وبكلمه واهيه يصرصعوا
ومن دمنا بيتدردعوا
خالد موسى السيد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.