وحداني لأني محروم انا مني
مش ناسيني لأني فغيري مبفكرش
بشتاقلي وببقى هناك ونا معايا
ولما بغيب عن عيني وجوايا
بنتظر دقة قلبي لما ارجع اكلمني
وانسى كل زعلي أنا مني
حتى العتاب بنساه
لأني خايف اعاتبني .. ازعلني
ماليش غيري
حفضل هنا .. ومستني
يمكن احن .. وقلبي يرق
ويرجعو شوقو تاني بالمحبة يدق
واقولي سامحني
مقدرتش على بعدي
ومتحملتش انا بعدي
انام فحضن احلامي
واصحا الاقيني قدامي
وفوق شباك الامل عصفور
وطاقة نور
ونا فاتح دراعاتي كما المسحور
واضم شوق الهوى لشوقي
وعيني تبص فعنيا
ودمعة عيني تنزل على خدودي
امسحهالي بإديا
والاقي بابي بيخبط
وصوتي فوداني
وااااه ياني
خاف قلبي اقوووم افتح
واسيبني ارجع لحلمي اتوووه مني
وخااااف مفتحش
حندم لو أ نا مرجعش
حيران بيني وبيني اكيد
وحرام اقسى عليا بالتأكيد
دنا حلمي اللي طرح جوايا ورد الفرح
انا نظرتي ليا دوا للجرح
انا اللي بسمتي تفرحني وببقى سعيد
وهلالي يهل عليا دا يوم العيد
محتار
اقوم افتح
ولا افضل معاك ف الحلم ؟؟؟
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.