رباعيات (وداعا ثورات الربيع)
******************************
.قطفوك ياورد الجناين في ربيع بلون الخريف
والجاني قاسي وغصنك أخضر وشوكك ضعيف
وف ساحة المحكمة قال حضرة القاضي :
يا نيابة لِمّي الورق ... الحلم كان تخاريف .
يا حلم ليه ختمتك دايما تكون كوابيس ؟!
حتى الملاك ألمحه .. فجأه يكون إبليس !
سجاني خاتم مكان النسر للوارد :
محلاك يا صوت الألم في ظُلمة المحابيس
من ظُلمة اليأس تتشقق طاقات النور
وهتبدأ "اللأ" تتحدى "النعم" وتثور
وبإيه تفيد الحياة في ظلام مالوش آخر؟!
من مات فدا الحق تشتاق له بنات الحور
وأخيرا وصايا للأمير:
****************
علشان تسوس العباد ف بدايتك اتمسكن
واوعد بجنة عدن بس انت تتمكن
واقطع إيدين أعاديك واطلق إيدين ناسك
وكل شيء بالقانون والشرع ... لو ممكن
******************
(سامح الدياسطي)
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.