قصيدة{أديب من حي السياله}
للدكتور/خالدعبدالحميد خربوش
٠•••••••••••••••••••••••••••••••
في اسكندريه بـ اقول
فيه حي شعبي شهير
إتسمَّى بالسياله
فيه ناس تحب الخير
عاش فيه تاجر تُوُنِسِيِ
وتجارته..هيَّ..حرير
اسمه محمد مصطفى
كان مصري روح..وضمير
*************************
رَزَقُه الإله بـ الولد
وعاش معاه سنوات
أصبح يتيم الولد
بعد امَّا ابوه ده مات
في الحي ده إتعرف
الطفل ده بالذات
محمود بيرم التونسي
ولحد ما بقى كبير
*************************
الطفل راح كُتَّاب
في الحي للشيخ جاد
وهناك حفظ أجزاء
قرآن وفيها...أجاد
ومِنُّه على مدرسه
كان اسمها الرشاد
كان كُرْهُه فيها مُدَرِّس
العربي له تأثير
*************************
كَفَلُه الشريدي..جوز أُمُّه
كان وقتها نجَّار
أخدُه حِرَف يختار
لكن معاه احتار
كانت ميول الولد
أدبيه مش بـ هزار
ويَّا فنون الأدب
كان يِطْوَل المشوار
*************************
ولمَّا ماتت أمه
أَخَدُه معاه الخال
وعاش فـ بيته كريم
وثقافته صبحت عال
المولى لما يريد
ييجي حال ويذهب حال
والعبد في التفكير
والرب في التدبير
*************************
سمع بـ قِصَّه فـ يوم
عن سلك ويَّا وابور
كانت محاوره خفيفه
وكاتبها شيخنا عاشور
عن قَطْر وتليغراف
أحداثها دي بـ تدور
راح إشتراها قوام
ووجودها..مش ح يضير
*************************
جنبيه محمد طاهر
ساكن وكان أستاذ
أهداه كتاب كان عن
عِلْم العَرُوُض ممتاز
حفظ البحور كلها
ونَظَم قصيده مَجَاز
عن ساعه هوَّ سائلها
وتجاوبه بـ التفسير
**************************
العُمر كان ماوصلش
عشرين سنه ياكرام
كان باقي على وقتها
يمكن تلات سنوات
شاف له عروسه وبَقَت
له هوَّ..هيَّ مدام
والرزق ع الخلَّاق
وبإذنه يبقى يسير
*************************
موت الزعيم مصطفى
كامل..دا أثَّر فيه
شاف دِنْشِوَاي قِصِّتُه
وقضيته...وعينيه
قرا عن كِفاحها وعرف
زهران...دا يطلع إيه
أبطال ورا أبطال
على أرضها بتغير
**************************
من عبدالله النديم
مافاته كان نبراس
ثوره بناها عرابي
ونديم دا فيها...أساس
في حربُه ع المُحتَّل
بـ كِتَابَه فيها حماس
بـ الشعر ويَّا خَطَابَه
و- بـ صحوه مش تخدير
**************************
قرا معظم اللي انكتب
شعر وكلام مزجول
وكمان قرا..لـ محمد
عثمان جلال بـ أصول
ولا عُمرُه مرَّه أندهش
واللا أصابه ذهول
هوَّ كدا العبقري
يشبه لـ بدر منير
*************************
فنان الشعب سيد
درويش رافقه الكفاح
في نقد الإنجليز
والسُلطه فيها طاح
بـ كلام صانع موسيقى
يجعل م الضيق...براح
رجَّاله فـ كل لحظه
ماخافوش سوء المصير
**************************
ساب المالح وراح
جاور أُم العواجز
في الحق...و- ع الحقيقه
دايماً كان يبقى ناجز
عاش بين كل الفئات
عُمرُه ماعمل حواجز
كان مُصلِح إجتماعي
و - لـ حُب الخير أسير
***************************
مع ثورة سعد نظم
شعرُه الوطني الجميل
م هُوُ قالها بنفسه شارب
من مَيِّتَك يانيل
وكلامه الحُر أَلْهَب
مشاعر كل جيل
دي دلاله بإن هوَّ
مابيخطأش المسير
***************************
عاش له ١٨ سنه
عن مصر منفي يا ناس
بعيد بـ الجسم لكن
رُوحُه وترابها مماس
واشتاق في الغُربَه ليها
بالفكر والإحساس
يكتب وكإنه فيها
ماحصلش له تغيير
*************************
و -فـ مينا بور سعيد
البَاخْرَه واقفه يادوب
في المينا ساعدُه راجل
واتمكِّن م الهروب
للقاهره راح بيته
لازْمُه عشان مطلوب
بالليل يروح القهوه
يعرف في إيه بيصير
***************************
واحمَد حَسَانين باشا
للشُرطه قال دا قرار
مايتمسكش بيرم
ليل واللا حتى نهار
واتنَقَّل من مجله
لإذاعه خَد مشوار
وصل لـ مُراَدُه لمَّا
عَدَّى صِعاب السير
*************************
وكان له دور في المسرح
بـ الجد مش تهريج
كان دوغري..في استقامه
مايحبش التعريج
فنان الشعب نالها
م الشعب له تتويج
من بعد ثورة يوليه
ودا شئ من التقدير
**************************
ومُعاَرضته لـ فطاحل
في شِعرُه ده له باع
وامتاز بتقليده ليهم
بـ قصايد استمتاع
في المجتمع عاش ينصح
مع نقده في الأوضاع
وكلامه خفيف مهذب
لكن له معنى خطير
****************************
إتصدَّى يوم لـ جبان
مأجور خسيس....إدَّاه
بـ تَهَجُّمُه على مقام
عَظَمِة رسول الله
خلًّاه مايسوى شئ
ولا يلقى رد معاه
ودا فضل ربي عليه
في سلاسة التعبير
*************************
دلوقتي ياعمِّنا
آسف على دا القول
إحنا فـ زمن معظمه
ياعمنا من دُوُل
وراح معاه الأدب
واتحدَّى أي أصول
وكل يوم بـ يفوت
يفرز له ألف أجير
…………………………………………
الدكتور/خالدعبدالحميد خربوش.
من ديواني المعنون:
من بيرم التونسي إلى الشاعر أبو خربوش
رقم الإيداع بدار الكتب
٢٠٠٧/١٩٨٠
الترقيم الدولي
977-17-4638-3
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.