في الطريق انا شفت ياما
ناس بتحكي ع اللي كان
شافوا ياما ليل ظلام
خوف ورعب ما فيش أمان
ناس تفكرها القيامة
وناس تقول فعل جان
قطر شايل موت وماشي
والسيول تخرب غيطان
القدر يرميه عليهم
نار وقادت في المكان
الجلود م النار بتصرخ
والعقول صابها الجنان
بعد لحظة سمعت صرخة
جاية من وسط الزحام
تبكي تصرخ فين أبويا
الحقوني يا ناس قوام
أمي فينها وفين أخويا
ليها مين غيرهم حرام
تبكي توصف ليل عذابها
تحكي ودموعها الكلام
سيل مالوش خط سير
نار بتحرق كل طير
والبيوت صارت قبور
والكفن فرش وحصير
في الطوفان غرقت سفينتي
عمري للأمواج أسير
والنصيب أني أعاني
وحدي وأتعذب كتير
بعد أمي وأبويا مافي
ليا مين في الدنيا مين
رب واحد هو دايما
للضعيف دايما نصير
......
محمود علي أحمد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.