الأمل
************
الوقت الضايع من عمرك
قول فين تلاقيه. ؟
والهم اللي مزود غمك
ازاي تداويه ؟
د الصوره بتشكي لمعالمها
من جرح... تملي بيألمها
والقلب الساكن ف ضلوعك
نفسه يخبيه
وليلاتي الصوره بتتألم
وبتشكي وجعها وتتظلم
وللا حدش شاعر بألمها
وللا حاسس بيه
لا اللون الغامق ف قزازها
ولاحتي ستاير بروازها
قادره تداريه
وزمانك واقف يتفرج
من غير ما يحاول يتحرك
ويبص عليه
لا الدمع النازف من عينك
ولا لون الظلم علي جبينك
يوم بكي عينيه
ف الدنيا الخطوه محسوبه
مكتوب نمشيها وللآخر
وان كنت ف مسرى او طوبه
مش ممكن أبدا تتاخر
عن حزن اتمكن ومعشش
ف قلوب مليانه من الحسره
بدموع العمر المنسيه
ع الحظ.. اللي انت بتنعيه
طب ليه بتضيع ف سنينك
وحنينك بتفرط فيه. ؟
لو حاسس بالناس بيعينك
فبلاش تتعامل ف الدنيا
مع ناس بتحاول لو ثانيه
تجرح ف القلب اللي اتوعد
علي دمع عينيه
وان عدا عليك الليل ميل
ع الكتف اللي ما عمره ما ميل
وتملي شايل ف همومك
وكفوفك دايما تشتاق له
وتحن إليه
واستني القمره اللي هتطرح
ف المطرح مليون ضحكايه
والصبح... المشتاق لوجودك
وتملي.... عشمان من جودك
تتحني ايديه
*********************
رضا أبو الغيط
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.