الحب...حياة فاروق الباشا
الحب الارواح راحة
لو كان فى غاية
او كان فى واحة
مية الوفا ترويه
ويقويه وصال وصراحة
الحب ارض فلاحة
تحضن توته وجميزة
تضلل خلايق كداحة
الحب زرعة معطرة
وناس حلوة مقدرة
وايد تاخد بالايد
فى ليالى قاسة جراحة
الحب جيرة متأصلة
بحبل الوداد متوصلة
وولاد وبنات اخوات
وقلوب مليانة سماحة
الحب عشرة جميلة
جناحتها خليل وخليلة
وعيشة ولو على القد
تخلى القلوب مرتاحة
الحب اهل وخلان
والله زراعه عرقان
وام توزع الحنان
علينا بصبر ونصاحة
الحب شجرة جراحة
يجدر واحد وفروع جماعة
سارحة لفوق فى السما
فوق الهامات لواحة
الحب عمات وحالات
ونسايب عشرة قرابات
وكبير باين زنهار
عيونه على الاصول لماحة
الحب دار بالهنا دفيانة
حاوية قلوب بالتقوى رويانة
الكبير فيهم عطوف
والصغير روحه بالادب زينانة
الحب قبل اللى فات
حب الله رب الحياة والممات
وحب الرسل والصحابة
دا اصل الحب بصراحة. الغيث الوفير فاروق الباشا مصر
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.