(حبيب ربى). ٢١/مارس/٢٠١٧
***********************************"*
حبيب قلبى وحبيب ربى
يا غالى عليا يا طه
يا تاج راسى ونبراسى
لروح القلب ف هداها
يا اسم ف صدر عرش الله
يا نور للدنيا ف سماها
ختمت الدين بكل يقين
يا مالى الروح بنجواها
يا نور بعته الكريم لينا
وكنا قبله ف متاهه
ينور ف الطريق عتمه
وياخد نفسى لهداها
حبيب قلبى وحبيب ربى
يا غالى عليا يا طه
بحبك حب مالى القلب
غلاوه و فرض من ربى
منايا انول ولو نظره
تمنى القلب وتلبى
طلب للروح بتحلم به
تطوف بالكعبه وتلبى
ويغفر بيها رب الكون
كتير ذنبى ويلطف بى
واجرى بسرعه أزور طه
وأفضفض ليه ومش أخبى
حبيب قلبى وح يعزرنى
ويهدينى لطريق دربى
اقول وجعى ويسمعنى
وامنى النفس بمناها
حبيب قلبى وحبيب ربى
يا غالى عليا يا طه
يا طه لما أقول اسمك
بسرعه تسيل دموع عينى
واصلى عليك وأزيد اكتر
احس صلاتى تروينى
وتخلع م الفؤاد نزغه
دى حظ شيطان بيغوينى
وتسرى ف البدن عافيه
فيكبر شوقى وحنينى
لعوده وانتظر دورى
على باب حبى فتحيينى
والملم كل شوقى اليه
واحكيله بينه وبينى
وانا عشمان ح يسمع لى
وتزهد نفسى دنياها
ما هو حبيبى وف قلبى
ونور لعنيا وضياها
حبيبى ربى وتاج راسى
يا سيد الكل يا طه
المحب للنبى /محمد الشاذلى
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.