قصيدة بعنوان.. شرنقة
لساك بتحلم باللقا
وتقضي عمرك بين دروب متشتتة
ماتفوق بقي
دي قصايدك المتزوقة
بترانيم وجع
زهقت وسافرت من خيالك للسكات
ولا كانش يخطرلك ف بالك
إن حلمك إللي يا ما حاربت علشان تملكه
مش باقي منو غير شوية ذكريات
ولاباقي من كل الملامح غير صور
ودموع بتنضح مر من تحت الخدود
مع ضحكة وقفت جوه حلقك
لا اتنست
ولامرة قدرت تاني ترجع تملي وشك
وانت ليه
لساك بتروي الحلم بدموع الوجع
وبتحضن اليتم اللي متداري ف عروقك
واللي فاضل جوه روحك
روح تخونك
مش بتغزل جوه عمرك غير شقا
ورجعت تنده تاني ع العمر الجميل
اللي اتسرق منك ف حضن الشرنقه
ويفيد بإيه الصبر من غير اللقا ؟!!
ماتفوق بقي !!!!
مع تحياتي
محمد محمد الطنطاوي
28/4/2016
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.