و سيب الضحكة لو تقدر
تكونلك ع الحياة شباك
تبصبها و تتبسم
و تنسى ان الاهات وجعاك
و مرة ف مرة تتعود
على دنيا بدون اشواك
تقوم الصبح من بدرى
تحس الفجر مستنيك
و نور الشمس بيصبح
و بيلمح بشوق لعنيك
فى ايده وردة فرحانة
و عشمانة فى لمس ايديك
و ييجى الضهر يندهلك
على مهلك ترد عليه
فتسمع صوته بيغنى
و نفسه ضحكتك تلاغيه
و على خده تفوت ايدك
و تغريدك .. يعانق فيه
و شوف الشمس و غروبها
و دوق دوبها فى حلم جميل
فتغرق فى اللى مش باين
و لا هاين و لا له دليل
و فاكرة معادها .. مش ناسية
و لا قاسية ... و رايحة تميل
و قرب حبة م الشباك
و حس هواك
و سيب ضيه البرئ يملاك
و قوله م النجوم ما يخاف
عشان تنشاف
و دفيهم اوى بصفاك
و عيش الحلم مهما يكون
و لو مجنون
بلاش تقفل عليه الباب
و خليه يسكن الوجدان
و كون انسان
و لا تظلم
و لا تتهان
و خد كل البشر اصحاب
#فهمى_على
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.