اللي عندي حب زايد
حب واصل للسعادة
حتى خوفي عليك زياده
مش ياروح القلب غيره
جوّه قلب القلب راشقه
اللي عندي حُب يشبه
حُب أم حُب بنت
حُب أخت حُب عاشقه
يعني لو ح ادخل مسابقه
ف الغرام ح ابقى البريمو
حبّي صح ومن قديمه
شوقي مش زي النهارده
عند كل الناس ديليفري
شوقي دايما حاجه أصلي
يعني روحك هيّ روحي
يعني قلبك هو قلبي
يعني لما ف يوم أخبّي
كل تفاصيلك ف روحي
واما اقول لورودي فوحي
كل ده مش غيره لكن
حسّه إنك ملكي وحدي
صوتك الكروان دا ملكي
صورتك الأحلام بتاعتي
كل حاجه فيك طبيعي
إني اشيلها ياروحي عندي
يبقى فين الغيره لمّا
تلتقيني باشق جلدي
لجل اخبّيك جوّه منّي
دانت جوّه عيوني نني
وانت جوّه القلب قلبي
شئ طبيعي تلاقي حُبّي
شئ خيالي مالوش مثيل
حب يشبه نهر نيل
يمشي ميل من بعد ميل
لجل يروي شجرة قاعده
ف الشَمال عند المصب
يبقى دا يا حبيبي غيره ؟
لأ ياروح الروح باقولك
اللي عندي ..إسمه حُب..
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.